"JAC te hmalakna hi eng Party mah in a fuihpawrh vang ani lo a, Kolasib hmangaihna vang a Pawl hrang hrang inzawmkhawm ten Kolasib in kawngchhia a tawrhna a nasat tawh em avanga rilru na leh NHIDCL ten Kolasib min hmusit em avang leh min thamlo em avanga hma la a ni tih hi Mizoram mipui te hian hria se a ti a ni," tiin an tarlang.

JAC chuan, Kolasib District kawngpui te chu hun rei tak a chhiat tawh avangin, Kolasib a Y4K, MUP, MZP leh Lirthei a eizawng Pawl hrang hrang ten hmalakna neiin, Joint Action Committee on National Highway (JAC) chu ni 5 February 2026 khan din ani ta a. NHIDCL te hian Kolasib mipui te min hmusit in min ngaihnep em avangin, NHIDCL Office 'Hual Hnatlang' neih alo rel ta a ni, an ti a.

He hnatlang nei tur a JAC in a rel hnu atang hian fimkhur taka hma la in Kolasib DC leh SP te nen uluk takin ngaihtuah nghal mawlh mawlh ani a. NHIDCL lam te nen pawh Meeting neiin he boruak an hriat rual rual a hna thawk nghal rum rum an nih thu te hriat ani leh zel bawk, an ti a.

Joint Action Committee (JAC) on National Highway, Kolasib chuan, Kolasib mipui te hi kan dawhtheih zia Mizoram mipui te hian hria se a duh a. Heti khawp a Mizoram Lifeline kawngpui ngaihthah ani chung hian Road Block te nei a, Zoram mipui tawrhna siam sak hi a duh lo a ni. Chutiang hre reng chung chuan, tluang takin NHIDCL lak a Peaceful Demonstration, tharum thawhna tel miahlo a neih a ni thei hi JAC chuan lawmawm a ti, tiin an tarlang.